48 ta maqollar qiz, ayol, xotin haqida

Ushbu sahifada qizlar, ayollar, xotinlar haqida o'zbekcha maqollar va hikmatli so'zlar to’plami yozilgan. Foydalanilgan manba: «O’ZBEK XALQ MAQOLLARI, 2005, SHARQ» kitobi.

  1. Yaxshi qiz erta turib, soch tarar,
    Yomon qiz erta turib, non so'rar.
  2. Terakka qarab, tol o'sar.
    Onaga qarab, qiz o'sar.
  3. Qiz bersang, otasiga qarab ber,
    Qiz olsang, onasiga qarab ol.
  4. Eringan qiz erdan qolar.
  5. Yomonga qiz tugul, tuz ham berma.
  6. Gul o'ssa — yerning ko'rki,
    Qiz o'ssa — elning ko'rki.
  7. Qiz bola — gul-lola.
  8. Qiz bola — uy ziynati.
  9. Shoshgan qiz erga yolchimas.
  10. Yaxshi qiz — uy obro'si.
  11. Bir qiz erga tegsa,
    Qirq qiz tush ko'rar.
  12. Qiz ko'ngli — qizigan tandir.
  13. Qarindoshdan qarz olma,
    Qarindoshga qiz berma.
  14. Musofirga qiz berma,
    Shahri — ikki,
    ko'ngli — ikki.
  15. Qiz chog'im — sulton,
    Kelin chog'im — ulton.
  16. Ayol tilini ayol bilar.
  17. Aqlsiz xotin husnini ko'z-ko'z qilar,
    Aqlli xotin — aqlini.
  18. Aqlli xotin — uy ko'rki,
    Chiroyli xotin — ko'cha ko'rki.
  19. Nozsiz xotin — yolqinsiz o'tin.
  20. Er topuvchan bo'lsa,
    Xotin taquvchan bo'lar.
  21. Shaharda bir xotin bo'lsa,
    Zargar ochidan o'lmas.
  22. Xotining yaxshi bo'lsa,
    Bu dunyoning charog'i.
  23. Epli xotin uyni tutar orasta,
    Epsizda uy to'ri latta-putta.
  24. Kumush xotin kunda — kasal,
    Oltin xotin oyda — kasal.
  25. Uyga jihoz yarashar,
    Xotinga — libos.
  26. Xotin — bo'yin, er — bosh.
  27. Xotin — uy bezakchisi,
    Er — uy ko'makchisi.
  28. Xotin — uyning ziynati,
    Er — mehnati.
  29. Xotin — uyning chirog'i.
  30. Xotin — umr yo'ldoshi.
  31. Xotin yaxshi — er yaxshi.
  32. Xotining yaxshi bo'lsa, yoqang oqarar,
    Xotining yomon bo'lsa, soqoling oqarar.
  33. Xotinli ro'zg'or guldir,
    Xotinsiz ro'zg'or cho'ldir.
  34. Xotinning yomoni — erning zavoli,
    Xotinning yaxshisi — erning kamoli.
  35. Xotinning chiroyi — erdan.
  36. Er-xotin — qo'sh ho'kiz.
    Er-xotin — qo'shqanot.
  37. Er qayerda bo'lsa, xotin ham shu yerda.
  38. Erdan — sadoqat, xotindan — itoat.
  39. Erni er qiladigan ham xotin,
    Qaro yer qiladigan ham xotin.
  40. Er-u xotin urushar,
    O'rtaga nodon tushar.
  41. Urishqoq xotin bor qishloqqa qo'riqchining hojati yo'q.
  42. Xotinni tanlab ol,
    Gulni — hidlab.
  43. Xotin chiroyi — erdan,
    Hosil chiroyi — yerdan.
  44. Yaxshi xotin arpa unni kabob qilar,
    Yomon xotin bug'doy unni xarob qilar.
  45. Yaxshi xotin — uy ziynati,
    Yomon xotin — to'y ziynati.
  46. Yaxshi xotin — xazina.
  47. Yaxshi xotin yuzida oy ko'rinar,
    Yomon xotin qovog'idan qor yog'ilar.
  48. Yaxshi xotin — hamisha bahor.

→ Boshqa mavzular bo’yicha o’zbekcha maqollar