73 ta maqollar do'stlik, o'rtoq, dugona, og'ayni haqida

Ushbu sahifada do'st, o'rtoq, dugona, birodar, og'ayni va jo'ra haqida o'zbekcha maqollar va hikmatli so'zlar to’plami yozilgan. Foydalanilgan manba: «O’ZBEK XALQ MAQOLLARI, 2005, SHARQ» kitobi.

  1. Aqlli do'st — rohat,
    Aqlsiz do'st — ofat.
  2. Ishonmagin do'stingga,
    Somon tiqar po'stingga.
  3. Sinamagan do'stingga sir aytma.
  4. Do'st orttiraman desang,
    Shirin suhbat qil.
  5. Tili shirinning do'sti ko'p.
  6. Yaxshi do'st yuz qarindoshdan yaxshi.
  7. Aybsiz do'st izlagan do'stsiz qolar.
  8. Ish do'sting — jon do'sting.
  9. Do'st bo'lsang, do'stingning aybini tuzat.
  10. Do'st achitib gapirar,
    Dushman — kulib.
  11. Do'st bilan sirdosh bo'l,
    Ishiga doim qo'ldosh bo'l.
  12. Do'st — do'stning oynasi.
  13. Do'sting kimligini ayt,
    Sening kimligingni aytaman.
  14. Do'st ziyonkor bo'lmas,
    Ziyonkor do'st bo'lmas.
  15. Chin do'st boringni oshirar,
    Yo'g'ingni yashirar.
  16. Yomonning do'sti ko'p,
    Piyozning — po'sti.
  17. Ikki yaxshi qasd bo'lmas,
    Ikki yomon — do'st.
  18. Arpa-bug'doy bir kuningga yaraydi,
    Sodiq do'sting o'lguningcha yaraydi.
  19. Vafoli do'st yo'lga solar,
    Ig'vogar do'st paydan olar.
  20. Ginali do'st — adovatli dushman.
  21. Davlating — do'sting.
  22. Daraxt — ildizi bilan,
    Odam — do'stlari bilan.
  23. Dushman do'st orasidan chiqar.
  24. Dushman siringni o'g'irlar,
    Do'st xatongni to'g'rilar.
  25. Do'st do'stni kulfatda sinar.
  26. Do'st ming bo'lsa ham — oz,
    Dushman bir bo'lsa ham — ko'p.
  27. Do'st og'ir kunda bilinar.
  28. Do'st sirini dushmandan pinhon tut.
  29. Do'st so'zini tashlama,
    Tashlab boshing qashlama.
  30. Do'st uzoqda bo'lsa ham, ko'ngli yaqin.
  31. Do'st yuzidan bilinar,
    Dushman — izidan.
  32. Do'stga aytdim so'zimni,
    Dushman bildi sirimni.
  33. Do'stda dushmanning qulog'i bor.
  34. Do'stga xiyonat qilma,
    Dushmanga — shafqat.
  35. Do'sti nodondan dushmani dono yaxshi.
  36. Do'sting — boyliging.
  37. Do'sting bo'lsa, bog'ing chamandir,
    Do'sting bo'lmagani — fe'ling yomondir.
  38. Do'stingga otilgan kesakning changi
    Sening ko'zingga tushar.
  39. Do'stlik — barcha boylikdan afzal.
  40. Do'stsiz boshim — tuzsiz oshim.
  41. Jon og'ritgan do'st bo'lmas.
  42. Jonga kuygan jonday do'st,
    Jonga kuymas qanday do'st.
  43. Kiyimning yangisi — yaxshi,
    Do'stning — eskisi.
  44. Ming so'ming bo'lguncha, bitta do'sting bo'lsin.
  45. Chin do'st tug'ishganing bilan teng.
  46. Chin do'st yuz xizmatchidan yaxshi.
  47. Yuz so'm puling bo'lguncha,
    Yuzta do'sting bo'lsin.
  48. Yaxshi ko'rgan do'stingga
    Yaxshi ko'rgan molingni ber.
  49. Quyosh havoni isitar,
    Do'st — qalbni.
  50. G'amingni do'stingga aytma, kuyunadi,
    Dushmaningga aytma, suyunadi.
  51. Har kimni do'stim dema,
    Tandagi po'stim dema.
  52. Hisobdan adashsang ham, do'stdan adashma.
  53. Hisobli do'st ayrilmas.
  54. Nomard do'stdan mard dushman yaxshi.
  55. Dasturxonga boqqan do'st emas.
  56. Gumon do'stdan ajratar.
  57. Do'stim deb siringni aytma,
    Do'stingning ham siri bor.
  58. Do'stingni do'st bilma,
    Do'stingning ham do'sti bor.
  59. Do'stni so'rab sina.
  60. Ichak-qorin go'sht bo'lmas,
    Laganbardor do'st bo'lmas.
  61. Davlat kelsa, yo'l ochar,
    Davlat ketsa, do'st qochar.
  62. Beparvo do'stdan yog'och yaxshi.
  63. Yerdan topsang sanab ol,
    Do'st qilsang — sinab.
  64. Yo'lda qo'shilgan — do'st bo'lmas.
  65. Ko'ringanni do'st bilma.
  66. Do'st safarda sinalar.
  67. Moling borida — ana do'st.
    Moling yo'g'ida — qani do'st.
  68. Og'a-ini arazli bo'lsa ham,
    G'arazli bo'lmas.
  69. Qayerga borsang ham, qora qozoning og'ayning
  70. Yaxshi joningga o'rtoq,
    Yomon — noningga.
  71. Botir o'rtoq — boy o'rtoq.
  72. Qadim do'stlik zanglamas.
  73. Xalq do'stligi — yurt boyligi.

→ Boshqa mavzular bo’yicha o’zbekcha maqollar