60 ta maqollar til, shirin so'z va muloyimlik haqida

Ushbu sahifada til, shirin so'z, xushmuomalalik va muloyimlik haqida o'zbekcha maqollar va hikmatli so'zlar to’plami yozilgan. Foydalanilgan manba: «O’ZBEK XALQ MAQOLLARI, 2005, SHARQ» kitobi.

  1. Odobning — boshi til.
  2. Mehr xazinasi — til.
  3. Bir shirin so'z bitkazar,
    Ming ko'ngilning yarasin.
  4. Tilni tiyishni ham bil, deyishni ham bil.
  5. Do'sting ham — til,
    Dushmaning ham — til.
  6. Til — aql bezagi.
  7. Til — aql o'lchovi.
  8. Til bor, bol keltirar,
    Til bor, balo keltirar.
  9. Til — dil kaliti.
  10. Tilga e'tibor — elga e'tibor.
  11. Tilga ixtiyorsiz — elga e'tiborsiz.
  12. Tili nopok — o'zi nopok.
  13. Tili shirinning do'sti ko'p.
  14. Shakar ham tilda,
    Zahar ham tilda.
  15. Shirin so'z shakardan shirin.
  16. Shirin so'zli shoh kosasida suv ichar.
  17. Tildan toygan yig'laydi,
    Tilini tiygan gullaydi.
  18. Yomon til boshga balo keltirar,
    Yaxshi til davlat, dunyo keltirar.
  19. Sevdirgan ham til,
    Bezdirgan ham til.
  20. Suydirgan ham til,
    Kuydirgan ham til.
  21. Achchiq til — zahri ilon,
    Chuchuk tilga — jon qurbon.
  22. Ey til, yaxshilikni bil.
  23. Til — dil tarjimoni.
  24. Dili qing'irning tili qing'ir.
  25. Dili qora — till qora.
  26. Yomon odam til bilan kuydirar.
  27. Ilon zahri — tishida,
    Yomon zahri — tilida.
  28. Ko'ngilni qo'l bilan ovlamasang,
    Til bilan ovla.
  29. Ochiq til osh yedirar,
    Achchiq til tosh yedirar.
  30. Til tig'i qilich tig'idan o'tkir.
  31. Til yugurigi — boshga,
    Oyoq yugurigi — oshga.
  32. Tilingda bo'lsa boling,
    Kulib turar iqboling.
  33. Tilni bog'la dil bilan,
    Dilni bog'la til bilan.
  34. Uzun tilim — uzgun tilim,
    Qisqa tilim — tizgin tilim.
  35. Tilingni botir qilma,
    O'zingni botir qil.
  36. Aqli kaltaning till uzun.
  37. Nodonning dili — tilida,
    Dononing tili — dilida.
  38. Shirin choying bo'lmasa,
    Shirin tiling bo'lsin.
  39. Mullaning oldida tilingni tiy,
    Ustaning oldida — qo'lingni.
  40. Til kichik bo'lsa ham dunyoni buzar.
  41. Til tugsa, tish yecholmas.
  42. Chaqimchining tilidan ilon hazar qilar.
  43. Til bilgan navkar — bol bilan shakar,
    Til bilmas navkar — obro'ni to'kar.
  44. Tilning suyagi yo'q.
  45. Ko'rganning tili bildirar,
    Kuyganning — dili.
  46. Buqa shoxidan ilinar,
    Odam — tilidan.
  47. Tiling bilan ko'nglingni bir tut.
  48. Tilning bo'shi boshga yetar.
  49. Tilginamdan qo'rqaman,
    Boshginamnnig balosi.
  50. Bola — shirinlikning adoyi,
    Qariya — shirin so'zning gadoyi.
  51. Bemorga shirin so'z kerak,
    Aqlsizga — ko'z.
  52. Puling bo'lmasa, bo'lmasin,
    Shirin so'zing bo'lsin.
  53. Shirin-shirin so'zlasang,
    Ilon inidan chiqar.
  54. Shirin yuzingdan shirin so'zing a'lo
  55. Mehmonga shirin so'z ber.
  56. Shirin oshing bo'lmasin,
    Shirin so'zing bo'lsin.
  57. Shirmoy noningni berma,
    Shirin so'zingni ber.
  58. Do'st orttiraman desang,
    Shirin suhbat qil.
  59. Shakarli tilga ishonma.
  60. Shirin gapga uchma,
    Maqtaganni quchma.

→ Boshqa mavzular bo’yicha o’zbekcha maqollar